Friday, May 17, 2013

మన చదువులు మారేదెన్నడో?

పదవతరగతి రిజల్ట్స్‌లో మా స్కూల్ ఫస్ట్ అంటే మాది ఫస్ట్ అంటూ టీవీల్లో పోటాపోటి ప్రకటనలు గ్యాప్ లేకుండా వేస్తున్నారు. బహుశా, మరికొన్నేళ్ళు ఇలాంటి పరిస్థితే కొనసాగవచ్చేమో? కానీ, ఒకరోజు రావాలి....ప్రశ్నాపత్రాలను పుస్తకాల్లో ఉండే క్వశ్చన్లతో కాకుండా పూర్తి concept ఓరియంటెడ్‌గా ఇవ్వాలి. అంటే, ఆ ప్రశ్నకు సమాధానం ఎక్కడా పుస్తకాల్లో లభించకూడదు. కేవలం ఆ విద్యార్థి తాను పుస్తకాల్లో చదువుకొని సంగ్రహించిన లేదా చుట్టూ సమాజాన్ని గమనిస్తూ గ్రహించిన నాలెడ్జ్ ఆధారంగానే రాయాలి. ఇది ఇంపార్టెంట్ క్వశ్చన్, అది ఇంపార్టెంట్ క్వశ్చన్ అని వాటిని మాత్రమే ఎక్కువగా బట్టీపట్టే విధానం తగ్గిపోయే రోజు రావాలి. అప్పుడు పరీక్షల్లో కాపీ కొట్టడం కూడా కష్టమైపోతుంది. :-)

ప్రస్తుత పరిస్థితుల్లోనే అమలుచేయచ్చా అంటే చేయడం కష్టం. సమస్య అయ్యవార్లతోనూ, పిల్లలతోనూ కాదు. పిల్లల తల్లిదండ్రులతోనే వస్తుంది. ఒకప్పుడంటే చదవకపోతే పిల్లాడిది తప్పు. కానీ, ఇప్పుడు అయ్యవార్లది లేదా స్కూల్ మీద ఎక్కువగా నిందలు వేస్తున్నారు. ఇన్ని లక్షలు ఫీజు రూపంలో కట్టాం, మా పిల్లాడికి కనీసం తొంభై శాతం మార్కులు రాకపోతే ఎలా? అని ప్రశ్నిస్తారు. అఫ్‌కోర్స్, అది ప్రైవేట్ స్కూళ్ళ తలనొప్పి. ఇక ప్రభుత్వ బడుల గురించి ప్రత్యేకంగా చెప్పఖ్ఖర్లేదు. ప్రజలనుంచి ఇప్పటికే ప్రభుత్వబడులమీద ప్రోత్సాహం కరువైంది.

ప్రస్తుత విధానంలోనే పాస్ పర్సెంటేజీ యాభైశాతం మించట్లేదు, మరి కొత్తగా కాన్సెప్ట్‌తో రాయమంటే పాస్ పర్సెంటేజీ బాగా తగ్గిపోవచ్చు. దాంతో మళ్ళీ అయ్యవార్లమీద ఒత్తిడి ఎక్కువగా పెరిగిపోతుంది. మాకెందుకు రిస్క్ అనుకుంటూ అయ్యవార్లు కూడా ఆ మార్కులేదో ఏసేస్తే పోలా అనే స్థితి వస్తుంది. ఎందుకంటే రిస్క్ తీసుకునేవాళ్ళను ఈ సమాజం ఎంకరేజ్ చెయ్యదు. నీకెందుకువచ్చిన తలనొప్పి అంటూ వెనక్కి ఎప్పుడూ లాగడానికి ప్రయత్నిస్తూ ఉంటుంది. స్టూడెంట్స్‌కు కాన్సెప్ట్స్ నేర్పించాలంటే చాలా టైమ్ స్పెండ్ చెయ్యాలి. ప్రాక్టికల్‌గా అర్థమయ్యేట్లు వివరించాలి. దానికి ఓపికతో పాటు టైమ్ కూడా చాలా కావాలి. ఓపిక ఉన్నా టైమ్ ఉండదు. ఈ టైమ్ కల్లా ఈ సిలబస్ పూర్తి చెయ్యాలి, ఈ టైమ్‌కల్లా పరీక్షలు అయిపోవాలి అని ఒత్తిళ్ళు ఉంటాయి. అది కూడా ప్రస్తుతం స్కూల్స్‌లో ఉన్న వనరులతో అర్థమయ్యేలా explain చెయ్యడం నాకు తెలిసి అంత సులభం కాదు. దానికన్నా ఒక ఫార్ములా బట్టీ పట్టడం చాలా సులభం.

(ఈ విషయంలో రాయాలంటే చాలా ఉంది. ఇప్పటికే పెద్దదైపోయింది టపా....మళ్ళీ ఎప్పుడైనా సందర్భం వచ్చినప్పుడు రాస్తాను).

Thursday, May 16, 2013

చేపలాట......

ॐ శ్రీరామ

చేపల్ని పట్టడం చిన్నప్పుడు ఒక సరదా....పట్టడం వరకే కానీ వాటిని తినాలనిపించేది కాదు....పట్టడంలో బోల్డు పద్ధతులుంటాయని అందరికీ తెలిసిందే.... ఒక మడుగులో తిరుగాడుతున్న చేపల్ని బుడుకుతూ కాళ్ళతో తొక్కి పట్టుకోవడం, గాలం వేసి పట్టడం, వల వేసి పట్టడం ఇలా అన్నమాట....

వీటిల్లో గాలం వేసి పట్టడం మంచి కాలక్షేపం. ఒక గాలానికి ఎరను తగిలించి చేపను ఆకర్షించి గాలానికి చిక్కుకొనేలా చేయడం ఇందులో పద్ధతి. చిన్నప్పుడు గాలం కొనేంత డబ్బులు నా దగ్గర ఉండేవి కావు. బహుశా రూపాయో, రెండ్రూపాయలో ఉంటుందనుకుంటా ఆ గాలం. కానీ, ఆ కాలంలో రూపాయికి చాలా విలువుండేది మరి.

మొదటిసారి జతగాళ్ళు (జతగాళ్ళు = ఫ్రెండ్స్) పిలిస్తే సరదాగా వాళ్ళతో పాటుగా వెళ్ళాను. అక్కడ అప్పటికే కొందరు పిల్లలు చేపలు పడుతున్నారు. ఒక చిన్న నీటిగుంట...ఎప్పుడో ఏరు పారినప్పుడు ఏదో ఫారిన్‌కొచ్చామని సంబరపడిపోతూ ఆ గుంటలో నీటితోపాటుగా నిలబడిపోయిన చేపలు...ప్రాప్తకాలజ్ఞతలేని ఆ చేపలు పిల్లల చేతిల్లో బంధీలైపోయి ఒడ్డునపడి ఒక్కొక్కటిగా బకెట్ తన్నేస్తున్నాయి.

ఒక కర్రకు దారం కట్టి దారం చివరన గాలం కట్టి ఉంది. దారానికి మధ్యలో ఒక చిన్న పుల్ల కట్టి ఉంది. దారాన్ని నీటిలోకి విసిరినప్పుడు గాలం నీటిలో మునిగి, పుల్ల నీటిపైన తేలుతూ ఉంటుంది. చేప గాలాన్ని టచ్ చేసినా లేదా గాలాన్ని నోట కరచుకొని ఎరను లాగినా ఆ పుల్ల నీటిలో మునిగిపోతుంది తద్వారా మనకు చేప గాలానికి చిక్కిందన్న విషయం అర్థమైపోతుంది. వెంటనే లాగేస్తే చేప దొరికేస్తుంది.ఇది క్లుప్తంగా గాలంతో చేపలు పట్టే విధానం.

ఫస్ట్ టైమ్ చూసినప్పుడు భలే ఇంట్రెస్టింగ్‌గా అనిపించింది. మరి మనకు గాలం ఎలా? డబ్బులు లేవు కదా....ఏం చెయ్యాలి? గాలాన్ని అబ్సర్వ్ చేశాను. ఐడియా! పిన్నీసును తీసుకొని దాన్ని అటూ ఇటూ ఒంచి గాలం షేపులో తయారు చేశాను. తర్వాత ఏం చెయ్యాలి? ఎర కావాలి? ఎర అంటే? వానపాములు. ఎక్కడ దొరుకుతాయి? భూమిలో? ఏ భూమిలో? అవతలి ఒడ్డున ఉన్న భూమిలో కొంచెం తడిగా బంకగా ఉంది, అక్కడ తవ్వితే దొరుకుతాయి? అవునా! అయితే సరే...వాళ్ళు చెప్పినట్లే తవ్వాను. ఏదో పురుగు వచ్చింది. కెవ్వ్వ్వ్వ్వ్వ్..... కానీ, అవతలివాడు సంతోషంగా దాన్ని రెండు ముక్కలు చేశాడు. అయినా అది చావలేదు. వామ్మో! ఇదేంటి ఇలా ఉంది. అదంతే, అలానే ఉంటుంది కానీ, ముందు దీన్ని పట్టుకో...వీటినే ఎరలంటారు, ఇలా పట్టుకొని గాలంలోకి చెక్కాలి అని చేసి చూపించాడు. యాక్క్క్క్క్క్..........(ఫస్ట్ టైమ్ కదా)

మెల్లమెల్లగా ధైర్యం వచ్చాక రంగంలోకి దిగాను. పిన్నీసుతో గాలమాఆఆఆఅ! కికికి అంటూ పగలబడి నవ్వారందరూ....లైట్ అనుకొని నీళ్ళలోకి గాలాన్ని విసిరేశాను. ఏం జరుగుతుందోనని ఉత్కంఠ. పిన్నీసు గోవిందా అని ఒకడు, నీ ఎరలు నాకిచ్చేయ్ అని ఇంకొకడు కామెంట్లు.... కాసేపయ్యాక నా గాలాన్ని ఒక చిన్న చేప లాగడం మొదలెట్టింది....పుల్ల లోపలికంటా మునిగిపోయింది....లాగేయ్య్య్య్య్......లాగేశాను. అబ్బ్బ్బాఆఆఆఅ...... ఆ చేప అటుపక్కనున్నోడి మీద పడి దానికున్న ముళ్ళు గుచ్చుకుంది. అవును, ఆ చేప రకాలు అంతే....వాటిని జాగ్రత్తగా పట్టుకోవాలి. లేదంటే చేయి కోసుకుపోవడం ఖాయం. వామ్మో! భయమేసింది. తొందరపడి పట్టుకున్నాను కాదు, చేయి తెగి ఉంటే ఇంట్లో వీపు విమోనం మోతే....

మొత్తానికి విజయవంతంగా రెండో, మూడో చేపలు పట్టాను. వాటిని వాళ్ళకే ఇస్తే అక్కడే కాల్చుకొని తిన్నారు. కొద్దిగా బరువైన చేప తగిలేసరికి ఆ పిన్నీసు గాలం కూడా ఒంగిపోయింది.